Në një ceremoni solemne, më datë 29.05.2016, në fshatin Nistrovë të Rekës së Epërme, u bë inaugurimi i Xhamisë së Re.
Në këtë solemnitet, përpos delegacionit të Bashkësisë Fetare Islame, përfshirë Muftininë e Gostivarit dhe Muftinitë tjera, si dhe banorëve vendas dhe fshatrave përreth, kishin ardhur edhe mysafirë të shumtë nga viset e tjera shqiptare.
Fillimisht, ky manifestim u hap me lexim të Kur’anit Famëlartë nga Hfz. Tahir ef. Halimi – imam në Xhaminë e fsh. Toplicë, për të vazhduar me fjalët përshëndetëse të Kryetarit të Këshillit Iniciativ z. Gjyljas Seferi dhe arkëtarit z. Besim Bilalli të cilët referuan mbi mbarëvajtjen organizative dhe financiare të Xhamisë. Për të bërë më të këndshëm këtë ambient, ishte Kori i Muftinisë së Gostivarit të cilët performuan me disa ilahi. Në këtë solemnitet enkas u recitua edhe një poezi nga nxënësi i Medresesë Nazmi Miftari me titull “XHAMIA” të autorit Prof. Mahir Hasani. Më pas, tubimin e përshëndeti kryetari i Komunës së Gostivarit z. Nevzat Bejta i cili foli mbi historikun e shkurtër të Rekës së Epërme dhe në veçanti të Nistrovës dhe jetës fetaro-kombëtare në këtë vend ndër shekuj.
Fjalë përshëndetëse kishte edhe Muftiu i Kërçovës H. Murat ef. Huseini dhe Muftiu i Strugës Mr. Salim ef. Sulejmani. Më tej, Kori i Muftinisë u prezantua edhe me një ilahi, që fjala e rastit të mbahet nga Muftiu i Muftinisë së BFI – Gostivar, Hfz. Shaqir ef. Fetahu i cili pasi i përshëndeti të pranishmit, theksoi mbi vlerën dhe rëndësinë historike që e ka xhamia në Islam duke falënderuar nismën e banorëve të kësaj ane në krye me z. Gjyljas Seferin si iniciator i parë.
Duanë e hapjes solemne të Xhamisë e bëri Hfz. Arif ef. Emini – ligjërues në Medresenë e Gostivarit dhe vaiz në Xhaminë e Lejthisë, të cilës dua i parapriu një lexim i mrekullueshëm i Kur’anit Famëlartë nga Muhamed ef. Veliu – referent i Muftinisë së Prilepit.
Pas këtij akti solemn, u bë edhe prerja e shiritit të kuq, ku edhe u dëgjua ezani Muhammedije dhe u fal namazi i drekës të cilit namaz i priu H. Ramazan ef. Hasa – Mufti i Dibrës.
Nga organizatorët, për të gjithë donatorët u ndanë mirënjohje dhe u shtrua edhe një drekë solemne.
Vlen të theksojmë se Xhamia e Nistrovës është edhe Xhamia e parë e legalizuar në Komunën e Mavrovës dhe Rostushës.