Një familje pakistaneze nga provinca Sindh u ka shërbyer çaj, kafe dhe ushqim vizitorëve të Xhamisë an-Nabawi në Medinë për afërsisht 70 vjet, një traditë përkushtimi dhe mikpritjeje që ka kaluar nëpër tre breza dhe është gërshetuar me jetën pranë Xhamisë së Pejgaberit ﷺ.
Ajo që nisi 70 vite më parë si një akt thjeshtë shërbimi nga gjyshi i familjes, sot menaxhohet nga nipi i tij, Mohammed Ali Abdul Rahman Al-Sindi. I lindur dhe i rritur në Medinë, Muhamedi drejton atë që në vend njihet si "safra".
Mohammedi e mori përsipër biznesin në vitin 1428 hixhri - afërsisht midis viteve 2007 dhe 2008 - dhe që atëherë ka vazhduar shërbimin e familjes për dekada të tëra.
"Është nder t'i shërbej besimtarëve. Kjo punë nuk është thjesht mjet jetese, por vazhdimësi e një amaneti fetar e familjar," thotë ai me mirënjohje.
Stenda u ka mbijetuar zgjerimeve, zhvendosjeve dhe kalimit të brezave - qëllimi i saj ka mbetur i pandryshuar gjatë gjithë kohës: t'u shërbejë mysafirëve që vijnë në shtëpinë e Pejgaberit ﷺ
Përkushtimi i familjes Al-Sindi shkon përtej shërbimit të përditshëm. Ata ruajnë me rigorozitet traditën e ushqyerjes së agjëruesve, duke ofruar vakte falas për Iftar në ditë specifike të vitit hixhri:
Çdo të hënë dhe të enjte, ditëve të bardha data 13, 14 dhe 15 të muajit islamik dhe gjatë muajit të Ramazanit
Edhe pse me origjinë nga Pakistani, familja Al-Sindi e konsideron Medinën shtëpinë e tyre të vetme. Fëmijët e Muhamedit janë diplomuar në shkollat lokale, duke vulosur integrimin e plotë në shoqërinë medinase. Për këtë familje, thënia vendase: "Shtëpia juaj më afër xhamisë është shtëpia më e mirë", nuk është thjesht një fjalë e urtë, por një realitet i jetuar me privilegj dhe përulësi.
Sot, stenda e tyre mbetet një simbol i bujarisë pa kufij, duke dëshmuar se si një vepër e mirë mund të kthehet në një trashëgimi që nuk njeh skadim.