Në qytetet me temperatura të larta, ku nxehtësia grumbullohet gjatë gjithë ditës, pemët janë ndër mbrojtëset më të mira dhe më të heshtura të klimës urbane. Ato nuk janë vetëm burim i hijes, por edhe makina të vërteta natyrore për freskimin e ajrit.
Mesatarisht, një pemë e pjekur mund të lëshojë deri në 380 litra avuj uji në ditë përmes një procesi të quajtur avullim. Ky proces ndodh kur uji tërhiqet nga toka, kalon nëpër rrënjët dhe trupin e pemës, dhe më pas dalë përmes poreve të vogla në gjethe. Ndërsa avulli i ujit lëshohet në atmosferë, ai ftoh ajrin përreth, duke krijuar një efekt natyral freskues.
Në fakt, sipas një studimi të cituar nga Berkeley Lab dhe Agjencia amerikane për Mbrojtjen e Mjedisit, kjo ftohje e natyrshme që siguron një pemë e vetme është e krahasueshme me funksionimin e pesë deri në tetë kondicionerëve për disa orë në ditë. Ndryshe nga kondicionerët elektrikë, pemët ofrojnë freski pa konsumuar asnjë vat energjie, pa zhurmë, dhe në mënyrë të plotë natyrale. Për këtë arsye, qytetet me më shumë pemë shpesh ndihen dukshëm më të freskëta sesa ato që kanë më shumë beton dhe asfalt.
Përveç efektit ftohës, pemët kontribuojnë në filtrimin e ajrit, uljen e përqendrimit të dioksidit të karbonit dhe ofrojnë hije të nevojshme. Megjithatë, në shumë zona urbane, pemët vazhdojnë të hiqen për të hapur vend për ndërtime të reja, duke ulur kështu këto përfitime natyrore.
Ky fakt nuk është vetëm një kuriozitet shkencor, por është një arsye e fortë për të mbjellë bimë në mjediset urbane. Në një kohë kur valët e të nxehtit po bëhen më të shpeshta dhe intensive për shkak të ndryshimeve klimatike, pemët janë një nga mjetet më efektive dhe më të përballueshme për të sjellë freski në qytete.