Arabia Saudite ka përfunduar shtrimin e mbi 84,000 metra katrorë rrugë në vendin e shenjtë të Arafatit duke përdorur materiale të ricikluara me origjinë vendase. Kjo si pjesë e Iniciativës në zgjerim të ‘Rrugëve të Ftohta’, e cila është rritur me 82% që nga fillimi i saj në vitin 2023, e që synon të rrisë rehatinë dhe lëvizshmërinë për miliona haxjinjë që mblidhen në Arafat çdo vit.
Rrugët janë rishtruar me materiale reflektuese inovative që kthejnë mbrapsht deri në 40% rrezet e diellit, duke ulur në mënyrë efektive temperaturat e sipërfaqes me rreth 12°C.
Kjo ftohje e konsiderueshme pritet të përmirësojë menaxhimin e nxehtësisë në një nga fazat më të vështira të Haxhit dhe gjithashtu të kontribuojë në uljen e përdorimit të energjisë dhe uljen e ndotjes së ajrit urban .
Një tipar dallues i projektit është shtegu për këmbësorë i sapo përfunduar me sistem ftohjeje prej 4,000 metrash që të çon direkt në malin Arafat.
I projektuar për të minimizuar dridhjet dhe për të rritur stabilitetin, shtegu është veçanërisht i dobishëm për personat me aftësi të kufizuara dhe haxhinjët e moshuar, duke siguruar lëvizshmëri më të qetë dhe më të sigurt gjatë gjithë udhëtimit të tyre.
Ky shteg tani përfshin 16,000 metra katrorë asfalt gome fleksibile, një rritje prej 33% nga vitet e kaluara. Kjo sipërfaqe e përparuar - e zbatuar midis Xhamisë Namira dhe Stacionit të Trenit të Arafatit - rrit rehatinë dhe sigurinë, veçanërisht nën trafikun e dendur këmbësorësh gjatë ditëve të pikut të Haxhit.
Sipas Qendrës së Kërkimeve Rrugore , rrugët e gomuara kanë kaluar të gjitha testet e nevojshme, duke konfirmuar si qëndrueshmërinë ashtu edhe përdorshmërinë e tyre për turmat e haxhinjëve.
Duke e përmirësuar më tej kushtet mjedisore, autoritetet kanë prezantuar një korridor të gjelbër prej 1,200 metrash përgjatë shtegut. Kjo zonë me hije përmban pemë, sisteme ftohjeje me mjegull dhe shatërvanë me ujë të pijshëm, duke u ofruar haxhinjëve momente lehtësimi dhe reflektimi gjatë kohës së tyre në Arafat.