Mbretëria e Bashkuar ka emëruar për herë të parë një ministre myslimane në krye të Ministrisë së Brendshme. Shabana Mahmood, deputete laburiste me origjinë pakistaneze, mori detyrën pas ristrukturimit të kabinetit nga kryeministri Keir Starmer.
E lindur në Birmingham në vitin 1980, Mahmood ka studiuar në Universitetin e Oksfordit dhe është angazhuar në politikë që prej vitit 2010, kur u zgjodh deputete. Ajo ka qenë ndër figurat kryesore të Partisë Laburiste dhe ka drejtuar fushata elektorale të rëndësishme.
Në fjalën e saj të parë si Ministre e Brendshme, Mahmood theksoi se qeveria do të forcojë politikat kundër emigracionit të paligjshëm dhe se mund të pezullojë vizat për vendet që nuk pranojnë kthimin e azilkërkuesve të refuzuar. Emërimi i saj përkon me një krizë të re migratore, pasi mbi 1 mijë persona kaluan Kanalin e Anglisë vetëm në një ditë.
Ky emërim shënon një moment historik për politikën britanike duke rritur diversitetin në nivelet më të larta të qeverisjes. Megjithatë, Mahmood pritet të përballet me sfida të mëdha mbi emigracionin, sigurinë dhe marrëdhëniet ndërkombëtare.