Sedat ef.Islami

Vëllezër të nderuar!
Kam përshtypjen se takimet tona me Robërit e Sinqertë të Allahut po rezultojnë shumë frytdhënëse. Çdo detaj që studiojmë nga jeta e tyre, praktikisht na del shumë i nevojshëm për kohën kur jetojmë. Sikur të gjitha vlerat e mirëfillta të moralit dhe personalitetit njerëzor kanë humbur. Edhe tema e sotme, që do ta diskutojmë e që ka të bëjë me ruajtjen e nderit dhe moralit, pjesë kjo përbërëse e personalitetit madhështor të besimtarëve të devotshëm, nuk është hiç më pak e rëndësishme se të tjerat, për të mos thënë se është ndoshta më e nevojshmja për debat dhe diskutim. Këtë e them ndërsa parasysh kam shthurjen dhe degjenerimin moral që për pasojë ka sjellë një model skandaloz jete dhe tërësisht të çekuilibruar. Ligjërata e sotme do të jetë nën hijen e komentimit të tiparit të tetë të Robërve të Sinqertë të Allahut (“Edhe ata që pos Allahut, nuk lusin zot tjetër dhe nuk mbysin njeriun që e ka ndaluar Allahu, por vetëm kur e meriton në bazë të drejtësisë,) dhe që nuk bëjnë kurvëri...” (El-Furkan, 68).


Ruajtja e nderit

Jo rastësisht Allahu ka veçuar me përmendje këtë tipar të tyre, ani pse në kontekst të përgjithshëm të përshkrimit të personalitetit të tyre do të kuptohej një gjë e tillë. Islami, nëpërmjet ruajtjes së moralit, respektivisht ndalimit të kurvërisë, synon realizimin e një stabiliteti shoqëror të përgjithshëm, në të gjitha sferat, ngase, siç do të flasim pak më vonë, prostitucioni është një sëmundje që nuk shkatërron vetëm moralin po edhe shëndetin, mirëqenien, raportet fqinjësore, miqësore e më gjerë.
Dhe ne, bazuar në këtë, mund të zbulojmë shumë lehtë disa nga qëllimet realizimin e të cilave Islami synon ta arrijë nëpërmjet ruajtjes së nderit(1).

E para është lidhja me Allahun, ngase rënia në këtë mëkat cenon shumë seriozisht këtë lidhje(2).

E dyta, krijimin e themelit për një shoqëri të shëndoshë.
Më konkretisht, krijimin e një familjeje të moralshme, e cila do të jetë një bazë stabile dhe e fuqishme për një shoqëri. E treta, ruajtja me fanatizëm e personalitetit të femrës. Islami, për të garantuar një klimë morale në shoqëri, ka ndërmarrë disa hapa shumë me rëndësi, prej të cilëve do të veçoja:

a. Ka ardhur me alternativa të lejuara.
Nëse ndalohet prostitucioni, atëherë martesa është e lejuar. Pejgamberi, a.s. ka thënë: “O ju të rinj! Po patët mundësi, martohuni!...” (Buhariu dhe Muslimi)

b. Ka ndaluar shkaqet që të shpien në këtë mëkat.
Allahu i Madhëruar ka thënë: “Dhe mos iu afroni imoralitetit (zinasë), sepse vërtet është vepër e shëmtuar dhe është një rrugë shumë e keqe”. (El-Isra, 32).
Ka thënë Shejhu AbduRrahman es-Sa’di: “Ndalimi i shkaqeve që të çojnë në prostitucion, është më i theksuar sesa vetë akti i shëmtuar i prostitucionit, për faktin se përfshin tërë atë që të shpie në këtë mëkat...”(3)

c. Ka nxitur e kërcënuar.
Për të parën, duke premtuar shpëtim në një ditë të vështirë, kur çdo kënaqësi e kësaj bote harrohet. Pejgamberi, a.s., duke përshkruar ata që do të gëzojnë mirësinë e hijes së Arshit, përshkruan edhe atë që ka ruajtur moralin e tij(4). Dhe, e dyta, duke kërcënuar edhe me humbje të besimit. Pejgamberi, a.s., siç shënojnë Buhariu dhe Muslimi, ka thënë: “Nuk ndodh laviri të bëjë prostitucion e gjatë asaj kohe të jetë besimtar…”


Argumentet e nda limit të prostitucionit

Prostitucion është një akt i shëmtuar, ndalimi i të cilit ka ardhur në citatet kuranore, profetike dhe në konsensusin e dijetarëve(5). Allahu i Madhëruar ka thënë: “Dhe mos iu afroni imoralitetit (zinasë), sepse vërtet është vepër e shëmtuar dhe është një rrugë shumë e keqe.”(El-Isra,32) Ndërsa Pejgamberi, a.s., duke folur për këtë mëkat të madh, respektivisht për masën ndëshkuese përkatëse, që njëherësh tregon sa për ndalimin, sa për madhësinë e këtij mëkati, thotë: “Nuk lejohet derdhja e gjakut të myslimanit përveçse në tri raste: i veji kurvar, shpirti për shpirt dhe renegati që largohet nga feja dhe braktis kolektivin”. (Buhariu dhe Muslimi).
Kështu, bazuar në ajetet dhe hadithet e sipërpërmendura, dijetarët myslimanë, që të gjithë, janë të mendimit se prostitucioni është prej mëkateve më të mëdha(6).


Rreziku i prostitucionit

Më herët përshkruam kalimthi rreziqet e këtij mëkati, kurse tani do të ndalemi pak më hollësisht.

a. Është prej mëkateve të mëdha.
Imam Dhehebiu në librin e tij el-Kebair(7) e ka llogaritur si mëkatin e dymbëdhjetë në regjistrin e mëkateve më të mëdha(8).

b. Është krahasuar me politeizmin.
Kurvarët janë të ndytë. Kështu i ka quajtur Allahu, ashtu siç i quajti edhe politeistët9. Thotë Allahu: “Të këqijat (gra ose fjalë) janë për të këqijtë edhe të këqijtë janë për të këqijat...”(En-Nur, 26).
Ibnu’l Kajjimi ka thënë: “Qëllimi nga ajetet është sqarimi i ndyrësisë (kuptimore) që gjendet në këtë mëkat, më shumë se në çdo tjetër, me përjashtim të politeizmit...”(10)

c. Kurvarit i është mohuar besimi i plotë.
Njeriut që bën këtë mëkat, gjatë kohës sa e kryen atë, i largohet besimi nga trupi. Prandaj, Pejgamberi, alejhi’s selam, siç e përmendëm edhe më parë, ka thënë: “Nuk ndodh laviri të bëjë prostitucion e gjatë asaj kohe të jetë besimtar…”. (Buhariu dhe Muslimi).

ç. Kurvari është mynafik
Kjo për shkak se ai fshihet nga sytë e njerëzve, po jo edhe nga Allahu, a kohë që Allahu ka thënë: “Ata fshihen (turpërohen) prej njerëzve, e nuk turpërohen prej All-llahut, e Ai është me ta edhe kur planifikojnë fshehtas thënie me të cilat nuk është i kënaqur Ai. Allahut nuk mund t’i shpëtojnë veprimet e atyre”. (En- Nisa,108).

d. Personalitet i pavlerë
Prostitucioni njeriut i bashkon të gjitha veçoritë e së keqes: Feja e paktë, humbja e devotshmërisë, humbja e burrërisë, xhelozia e paktë si dhe varrosja e nderit apo virtytit. Pastaj, nxirja e fytyrës dhe errësimi i saj si dhe hidhërimi, brenga dhe dertet, të cilat u shfaqen qartë njerëzve nga fytyra e tij.

dh. Shkaktar krimesh
Prostitucioni mund të jetë derë për krime të tjera të mëdha. Ta zëmë, kur gruaja të mbetet me barrë nga prostitucioni dhe mbyt (aborton) foshnjën, atëherë ajo ka kryer dy krime të mëdha: prostitucion dhe mbytje të paligjshme. Ndërsa, nëse është e martuar dhe ka mbetur me barrë me tjetërkënd, ajo në shtëpinë e burrit ka sjellë njeri të huaj, i cili i trashëgon, bëhet pasardhës i tyre, e në të vërtetë, ai nuk ka të bëjë fare me ta.

e. Rrezik i përhershëm për shëndetin
Sida(11) është gjëja e parë që të vjen ndërmend me të përmendur të rreziqeve të prostitucionit në këtë aspekt(12). Por, çështja tek e cila dua të ndalem pak më hollësisht këtu, është një zbulim shkencor që mjekësia ka bërë kohët e fundit(13). Gruas, për të qenë e aftë për t’u martuar me burrin e dytë, i duhet të presë hiç më pak se tri pastrime menstruale. Arsyeja qëndron në faktin se meshkujt dallojnë nga njëri-tjetri edhe në lëngun rrjedhës (spermën), kështu që, po pati gruaja marrëdhënie me dy burra në një periudhë të afërt, atëherë çrregullimi i brendshëm tek ajo mund të ndodhë dhe mitra e saj kanoset gjithmonë nga kanceri. Ky studim mitrën e gruas e krahason me një aparat që infektohet nga ky mëkat, ashtu siç mund të infektohet një aparat teknologjik nga virusët. Për shkak të këtyre rreziqeve që bart, jo vetëm për ata që ushtrojnë këtë profesion të mallkuar, po edhe për tërë shoqërinë, Islami ka paraparë ndëshkime të rrepta për ata që kryejnë këtë mëkat.


Ndëshkimi për prostitucionin

Ajo që tregon se prostitucioni është mëkat i madh, është edhe fakti se Allahu kodin penal për prostitucionin e veçoi prej kodeve të tjera. Thotë Allahu:“(dispozitë obliguese është që) Laviren dhe lavirin t’i rrihni, secilin prej tyre me nga njëqind të rëna, dhe në zbatimin e dispozitave të Allahut mos u tregoni zemërbutë ndaj atyre të dyve, nëse jeni që besoni All-llahun dhe botën tjetër. E gjatë zbatimit të ndëshkimit ndaj tyre, le të jenë të pranishëm një numër besimtarësh”. (En-Nur, 2).
Ibnul Kajjimi sqaron: Allahu kodin penal për zina e ka veçuar prej kodeve të tjera me tri veçori:

1. Mbytja për këtë mëkat (e të martuarit) në formën më të keqe, kurse, për sa i përket lehtësimit të këtij kodi (për ata që nuk janë të martuar), është: Xhildi (rrahja me kamxhik) dhe internimi për një vit nga vendi.

2. E ka ndaluar të tregohen të mëshirshëm myslimanët ndaj lavirëve, sepse Allahu, nga mëshira ndaj tyre, e ka ligjësuar këtë ndëshkim.

3. Allahu ka urdhëruar që ekzekutimi i ndëshkimit të tyre të bëhet në praninë e një grupi besimtarësh e jo në vetmi, kur nuk mund t’i shohë askush, sepse ky është ndëshkimi më i theksuar si dhe njëherësh është urtësi e vetëpërmbajtjes nga ky mëkat.


Përmbyllje

E shihni sa madhështor janë myslimanët kur ata zbatojnë fenë e tyre? E shihni sa është e sigurt dhe çfarë mirëqenieje disponon shoqëria që udhëhiqet nga Islami? E shihni se si janë, në të vërtetë, vlerat morale dhe si është botëkuptimi i mirëfilltë për to? Atëherë, takimi ynë me Robërit e Sinqertë të Allahut, le të mos mbarojë këtu, po le të qarkullojnë këto mësime në ambientet tona, le të përvetësojmë moralin e tyre, le ta jetësojmë në praktikë programin e tyre, sepse vetëm kështu mund të arrijmë kënaqësinë e Zotit tonë!
O Zoti ynë! Ne Të detyrohemi për çdo mirësi që na ke dhënë, Të falënderojmë shumë dhe Të lusim që Kuranin, pranverën e shpirtrave tanë, ta bësh udhëzues tonin në këtë botë dhe shpëtues në botën tjetër!



1)El hikem el xheliletu fi tahrimi’z zina, http://www.islam-qa.
2)Es Sa’d, Halid, Hutabu’sh Shejhi’l Kardavi, (Bejrut: Muessesetu’rr Rrisale, b.1, 2000), f: 106.
3) Ebu-l-Ata, Nadhmi Halil, Innehu kane fahisheten ve sae sebilen - mu’xhizetun kur’anijjetun, http://quran-m.com
4)Hadithin e transmetojne Buhariu dhe Muslimi.
5)Ve la takrebu’z zina, www.kalemat.org
6) El-Aslu enne’z zina a’dhamu ithmen ve ekberu xheremen mine’l mejsiri ve shurbi’l hamri, www. islam-qa.com/
7) Edh Dhehebijj, Shemsuddin b. Muhammed b. Ahmed b. Uthman, recensent: Hani el Haxh, (Kajro: Mekbetebetu’l ilm, b.1, 1999), f:51.
8) Edh Dhehebijj, Shemsuddin b. Muhammed b. Ahmed b. Uthman, recensent: Hani el Haxh, (Kajro: Mekbetebetu’l ilm, b.1, 1999), f. 56.
9)Shih: Kur’ani, kap. Et Teube, 28.
10)Ez-Zehrani, Jahja b. Musa, Fahishetu’z zina, www.saaid.net